MUNDU ARABIARRA ARRASATEN

Inaugurazio-ekitaldia, 1973ko apirilaren 2. Ezkerretik, Josiña Etxebeste, Zahdi Labib, Pedro Basterretxea, Mohamed Haraga, Santiago San Martin, Alfonso Gorroñogoitia, Javier Mogelos eta ezezaguna

Gaurko ekarpen honetan, duela berrogeita hamar urte Arrasaten izandako ekintza baten gaineko aipamena egin nahi dut. Egunkari zaharretan arakatzeko nire zaletasunak ahalbideturik, Arrasate S.C.I-ren eskutik 1973ko apirilean garrantzi handiko jardunaldiak antolatu zirela irakurtzeko aukera izan dut eta horixe konpartitu nahi dut irakurleekin.

 "Jornadas de aproximación a la cultura y problemas del mundo árabe" izeneko ekintza izan zen. Zer dela eta? Aipatu kooperatibak irabazi berri zuen Libian soldatutako hodiko lantegi bat eraikitzeko konkurtsoa, mundu guztiko beste lehiakideen artean,  eta enpresaren buruei otu zitzaien aukera ona zela mundu arabiarra arrasatearren aurrera ekartzeko. Eta, aldi berean, pentsatu zuten Arrasatetik Libiara lanera joan beharko zuten tekniko eta langileentzat lurralde haren gaineko berri  zabala ez zitzaiela gaizki etorriko. Egitarau erakargarria osatu zuten jardunaldietarako. Irakur dezagun iragarritakoa

 “1. El mundo árabe-musulmán y occidente. Hoy y ayer 2.Formación de la cultura árabe-musulmana. Arabia. Concepción del mundo preislámico. El sentido del Islam. La misión de Mahoma. Expansión del Islam y sociedad política, ley y derecho. 3. Desarrollo de la cultura árabe-musulmana. El original de la espiritualidad islámica. El encuentro con la ciencia y la filosofía de la antigüedad. 4. Las aportaciones del mundo árabe-musulmán. Europa, año 1000. Conocimiento de la cultura helenista a través de los árabes. La península ibérica y la Escuela de Traductores. Aportaciones científicas, teológicas y místicas, filosóficas, económicas y políticas. 5. El agotamiento de la cultura árabe-musulmán clásica. Migraciones mongolas y turcas. 6. El renacimiento del mundo árabe-musulmán. La rebelión árabe ante el colonialismo. Porvenir del mundo árabe-musulmán”

 Arrasate S.C.I-ren garaiko zuzendaritza batzordeko burua zen Josiña Etxebestek jardunaldiak aurkeztean azaldu zuenez, beren enpresako langileentzat ez ezik, Ularcoren gainerakoentzat eta, oro har, euskal erakundeentzat ere interesgarriak ziren, mundu arabiarraren eta gurearen arteko zubiak sendoagoak bilakatzeko bitartekoa bilaka baitzitezkeen. Eta gehitzen zuen:

Miguel Cruz Hernandez

"Uste dugu herri desberdinen arteko ezagutzak esfera ekonomikotik at ere egon behar duela, eta arlo kultural, historiko, erlijioso eta politikoa hartu behar ditu kontuan giza-maila batean jartzeko, hornitzaile-bezero binomioa aberastuz, adiskidantza, elkar ulertze eta kooperazioaren bidez"

 Jardunaldien hasiera apirilaren 2an, astelehen arratsaldean izan zen, herriko Udaletxearen areto nagusian eta inauguraziora Mohamed Haraga Libiako enbaxadorea azaldu zen Arrasatera. Berarekin batera, ekitaldian Zahdi Labib Estatu Arabiarren Ligako ordezkaria ere egon zen; halaber, Santiago San Martin Gipuzkoako Diputazioaren lehendakari ordea eta, noski, Arrasateko agintariak Pedro Basterretxea alkatea buru. Alkateak enbaxadorea Urrezko Udal Liburuan sinatzera gonbidatu zuen eta Arrasateri buruzko euskaraz eta gaztelerazko argitalpen batzuk oparitu zizkion.

 Arratsalde hartako saioan, Gillen Azkoaga Ularcoren Formakuntzarako Zerbitzu buruaren hitzaldi txiki bat izan zen, Miguel Cruz Hernandez (1) Salamankako Unibertsitatearen katedradunaren ikasgai magistralaren aurretik. Katedraduna kultura arabiarra eta mendebaldeko munduari buruz aritu zen.

Jardunaldiek jarraipena izan zuten hurrengo egunetan Ulgorreko areto nagusian, Pedro
Martinez Montavez (2) Madrilgo Unibertsitate Autonomoaren katedradunaren hitzaldiarekin; eta Eskola Profesionalean, Islamiar Ikaskuntzen Institutuak utzitako pelikula baten proiekzioarekin eta Mahmud Sobh eta Pedro Martinez Montavezen olerki-errezitalekin.

Horra hor, Arrasatetik mundu arabiarraren aurkezpen xume baina baliotsuaren laburpena. Diodan, nik ditudan kazeta-erreferentziak herriko korrespontsalei esker lortu ditudala. Tokiko informazioaren txokoan agertu ziren egunkarietan. Arrasate urruti, oso urruti zegoen eta dago, informazioa zerbitzatzen diguten zentroetatik. Jardunaldi haiek ez zuten, antza denez, argazki bakar bat ere merezi izan Gipuzkoarako.  Eskerrak Josiña Etxebesteri, ekitaldietako Epelderen erreportaje grafikoa gordetzeagatik.

 A! eta Arrasaten jardunaldiak eskaintzen ari ziren bitartean, Anwar el Sadat Egiptoko presidenteak “erabateko konfrontazioa” aldarrikatzen zuen Israelekiko, eta Gaddafik “mugimendu azkarrak” iragartzen zituen judutarren kontra. Golda Meier Israeleko lehen ministroak zioen Richard Nixonek arma gehiago agindu ziola. Eta Parisen buruzagi palestinar bat hil zuten Israeleko zerbitzu sekretuek.

Argazkiak: Josiña Etxebeste

 

(1)    Miguel Cruz Hernández, politiko, filosofo eta arabiar munduan aditua zen; Salamankako alkatea izan zen Francoren garaian, Albaceteko gobernadorea eta trantsizioan estatu idazkaria.

(2)    Pedro Martínez Montávez, arabiar kulturan aditua, Hiizkuntza Arabiarraren Ammango Akademiaren kidea eta Herri Palestinarraren Lagunen Elkarteko lehendakaria izan zen. 2023an hil da.