DAVID ARZAMENDI HIL DA

David Arzamendi, organoan

 http://www.fentmuntanyaiformacio.es

David Arzamendi hil da. Hauxe izan zen atzoko albistea. Pasa den abenduko 15ean ospatu zuen Davidek senitarte guztiokin bere 99gn urtebetetzea. Eta ezina izan zaio mendeurrenera heltzea, lagun denok opa genion bezala. Joan da, 1932z geroztik Arrasateko organo jolea izan den gizona. 

Gurasoak eta anaia-arrebak

Bost urterekin ekin zion musika ikasteari Eustakio Arregi bere adiskidearen eskutik. Zortzi urterekin, berriz, Jose Diez Umerez oñatiarrarekin hasi zen solfeoko ezkutuetan, parrokiako koruan tiple bezala aritzeko. Eta Saturrarango Apaiztegitik igaro ondoren, 1930ko irailaren 30ean Gasteizko Apaiztegi Kontziliarraren inaugurazioan abestu zuen, Alfontso XIII erregeak presidituriko ekitaldian.

Ordurako piano ikasten ari zen, Arrasateko parrokiako Jose Izurrategi abadearekin eta haren ondoren heldu zen Dionisio Isasmendirekin jarraitu zuen eta organo jotzeari ere ekin zion eta Isasmendi titularrak ezin zuenean Davidek hartzen zuen erreleboa. Gasteizko Apaiztegian musika eta organo ikasketak aberastu zituen eta 1936an Gasteizen bertan egin behar izan zuen soldadutza. Hori dela eta, hiriburuko San Miguel eliza nagusiko organo jole titularra zen Luis Aranbururen aginduetara jarri zen, eta igandero Meza Nagusian jardun zuen, egundoko arrakastarekin. 

Lola emaztea eta seme alaba batzuekin

Behin gerra zibila hasita, Toledoko Arma Lantegira bidali zuten 1937ko urtarrilean eta Gasteiztik alde egin zuen egunean  eliza nagusiko abadeek eta Aranburu musikariak San Migeleko Bizi Bitarteko Organo Jolea izendatu zuten David.

Musika kontuetan, berriz, ez dago Arrasateko musika historia ulertzerik Daviden ekarpena ezagutu gabe. XX mendeko erreferenterik handienetakoa izan da, bere anaia Juanekin

Organoa jotzen jai batean

batera. Organo jole izateaz gain, Davidek zenbait musika doinu konposatu zuen; parrokiako abesbatza zuzendariaren ardurak ere hartu zituen bere gain, horrela eskatu zitzaionean. Daviden txikitako laguna zen Julian Sagasta organo jole ospetsua, eta beraren hitzak dira, Goiena aldizkarian publikatuta: “Hori (David) bai dela benetako mondrauetarra. Arrasateko kontu guztiak berari esker ezagutzen ditut”

Santa Agedako abeskideekin

Davidi omenaldia eskaini zion Arrasateko Parrokiak 1995eko urtarrilaren 15ean, elizako musika ardura hartu zuenetik hirurogei urte bete ondoren. Egia hertsira alderatuz gero, Davidek berak beti uzten zuen garbi inoiz ez zela organo jole nagusia izan 1993ko maiatzera arte, orduan hil baitzen Frantzisko Arrizabalaga aurreko titularra. Baieztapen horrezaz batera, Davidek gehitzen zuen Dionisio Isasmendi eta Frantzisko Arrizabalagak koruaren ardura nahiago zuten bitartean berari uzten ziotela beti organoaren erantzukizuna. Beraz, nahiz eta de iure-koa ez izan, David genuen organoaren arduraduna. Edozein modutan, bere burua apalduz, eskerroneko hitzak izan zituen beti, organo jole lanetan lagundu zioten Karmelo Eriz, Gurutze Uribarren eta Eugenio Etxebeste lagunentzat.

David Arzamendi Enparanza (Arrasate 1914-12-15; Arrasate 2014-01-25)

Domingo eta Benita izan ziren gurasoak. Domingo Arrasateko alkatea izan zen bi aldiz, (1921-23 eta 1938-48)

Felix Aranoren ikaslea izan zen Biteri Eskoletan, eta 2008ko uztailaren 18an Arrasaten Biteri mezenasi eskainitako ekitaldian  elkarrekin eman genuen hitzaldi bana. Bertan argi geratu zen Davidek bere maisuarekiko zuen miresmena (1) 

"Loramendi"ren omenaldian Bedoñan, 1959an

Gerra ostean Roneo Unión Cerrajeran hasi zen lanean, eta urteekin Hetruc (Hermandad de Trabajadores de Unión Cerrajera)ko administrazioan aritu zen, jubilatu arte. Hetrucen egundoko lan ederra egin zuen. 

David oso inplikatua egon zen beti Arrasateko gizarte bizitzan. Zuzen-zuzenetik jarraitu zituen gorabeherak eta aipagarrienetako bat, eta seguruenik ez ezagunetakoa, 1953ko abenduaren 9an Franco jeneralari beste lagun batzuekin batera bidali zitzaion eskutitzarekin dago erlazionatuta. Bertan kexatu egiten ziren, San Juan auzoko etxe bizitzak – Obra Sindical del Hogar zeritzan erakundeak eraikita- auzokideei  saldu nahi zizkieten prezioarengatik. “Suplican se digne ordenar a las Entidades u Organismos competentes la apertura de una serena y solvente información sobre la materia, por si pudiera caber una rectificación de cifras” adierazten zioten jeneralari idazkian. 

Bilarrean jolasten, Zentroan

David oso inplikatua egon zen Ekintza Katolikoaren Zentroko kudeaketan, 1950-1970 urteetan. Gutariko askok gogoatuko dugu Daviden irudia, Zentroko bilarretan bere abileziak erakusten ari. Artista bat zen takoarekin. Berari eta Jose Mari Urangari esker Juan Butron bilarreko munduko txapeldun bilbotarrak 1959ko otsailaren 20an Zentroan erakuspen zabal bat eskaini zuen.

============..==========

Arrasateko eliza nagusiko abesbatzak “Agnus Dei” abestu eta Davidek organoa jotzen dueneko bideo bat jarri nuen duela hiru urte ondoko helbide honetan:

http://www.youtube.com/watch?v=jfxGLduCw3I

   (1)   http://www.euskonews.com/0461zbk/gaia46102eu.html